TANGAZO
Na Christopher Lilai,Nachingwea.
Wananchi wilayani Nachingwea wameilalamikia serikali kuchelewesha pembejeo
za ruzuku kwa vocha ambapo hadi hivi sasa wakulima
hawajafikiwa ikiwa ni muda wa kupanda mazao mbalimbali hivyo
kuathiri kwa kiasi kikubwa kilimo.
Wakitoa kero mbalimbali kwa Mwenyekiti wa
halmashauri ya wilaya ya Nachingwea,Ahmadi Makoroganya wakati wa ziara
yake kwenye kata walibainisha kuwa ucheleweshaji huo utaathiri mavuno kwani
hata pembejeo hizo zikisambazwa hivi sasa zitakuwa hazina manufaa kwani
wakulima wengi wameshapanda mazao kwa kutumia mbegu zisizo na ubora
na bila kutumia mbolea ya kupandia .
Mwenyekiti wa kijiji cha Nampemba kata ya
Kilimanihewa,Abdalah Kumpunda, alisema kuwa mkakati wa kilimo kwanza unaendana
na matumizi ya mbolea na pembejeo za kilimo hivyo amesikitishwa na utaratibu
mzima wanaofanyiwa wakulima kwani imekuwa ni mazoea ya serikali kila mwaka
kutozifikisha pembejeo za ruzuku kwa wakati.
“Cha kushangaa wataalamu wa kilimo wanajua ni
muda gani wa kupanda lakini hadi muda huu wakulima hatujapatiwa hizo
pembejeo na hata zikipatikana leo hazitakuwa na faida yoyote kwetu”alisema
Kumpunda.
Nae Mtendaji wa kijiji cha Nammanga kata ya
Ruponda,Mtibuwa Kijazi alisema kuwa serikali imesambaza vocha za
pembejeo na huku pembejeo zenyewe hazijulikani zitasambazwa lini jambo ambalo
linaonesha kutokuwa na umakini na swala zima la kuwasaidia wakulima.
Kwa upande wake Mwenyekiti wa halmashauri ya
wilaya Nachingwea,alikiri kuwa hadi hivi sasa halmashauri yake
haijasambaza pembejeo za vocha na kuwa utaratibu wa kumpata mzabuni
atakayesambaza ameshapatikana na kuwa muda wowote mbejeo hizo zitawafikia
wakulima.
Makoroganya pia akiri kuwepo na ucheleweshaji wa
mchakato mzima wa mpango huo ambao haundani na muda wa kilimo hivyo kuahidi kuwa
katika kipindi chake cha uongozi hatahakikisha mchakato mzima wa vocha za
pembejeo unaanza mapema ili uendane na msimu wa kilimo tofauti ya inavyofanyika
hivi sasa ambapo hauzingatii ratiba ya kilimo.
Mwenyekiti huyo katika ziara yake alihimiza
wakulima kubadili kilimo kwa kutumia mbolea za kupandia na kukuzia
na matumizi ya mbegu bora ili kuongeza uzalishaji wa mazao ya chakula na
biashara ili kuwa na kilimo chenye tija.
TANGAZO
Facebook Blogger Plugin by WAYEGE CO.LTD
