TANGAZO
 |
| Ofisa Elimu Msingi H/Mji Masasi Mzenga Twalibu |
Na Clarence
Chilumba, Masasi.
Ofisa elimu msingi
Halmashauri ya mji wa Masasi mkoani Mtwara Mzenga Twalibu amewajia juu waratibu
elimu kata wawili wa Halmashauri hiyo huku akionesha wazi kuchukizwa na kitendo
cha wanafunzi wa shule za msingi kutoka kwenye kata hizo kushindwa kushiriki
kwenye kambi ya michezo ya Umitashumta kwa ngazi ya halmashauri hiyo.
Waratibu elimu kata
ambao kata zao zimeshindwa kushiriki kwenye michezo hiyo iliyokuwa na lengo la
kutafuta timu ya Halmashauri ya mji wa Masasi itakayoenda kushindana na
Halmashauri zingine mkoani Mtwara ili kupata timu ya mkoa ni kutoka kwenye kata
ya Sululu inayoongozwa na mwalimu Hussein Bwanali pamoja na kata ya Mwenge
Mtapika iliyo chini ya mwalimu Alli Chipotela.
Pia ameweka wazi msimamo wake kwa viongozi hao wa elimu kuwa atakayeshindwa kutoa maelezo ya kina ni
kwa nini kata zao hazikushiriki mashindano hayo muhimu kwa wanafunzi basi
atosita kuwachukulia hatua kali za kinidhamu
ikiwa ni pamoja na kuwaondoa kwenye nafasi zao za uratibu.
Alitoa
kauli hiyo jana mjini humo wakati anafunga mashindano ya umoja wa michezo na
taaluma kwa shule za msingi Tanzania (Umitashumta) kwa ngazi ya Halmashauri
hiyo yaliyofanyika kwenye viwanja vya shule za msingi Masasi ambapo alisema
kitendo kilichofanywa na waratibu hao ni utovu wa nidhamu kwa uongozi wa idara
ya elimu msingi na kwamba hawapaswi kuachwa hivi hivi.
Alisema
moja ya majukumu yao ni kuhakikisha suala la michezo kwenye kata zao
linatekelezwa kikamilifu na kwamba kwa kushindwa kwao kutekeleza sera ya
serikali kuhusu michezo ni dhahiri kuwa hawatoshi kuendelea kushika nyadhifa
hizo za uongozi wa elimu kwa ngazi ya kata na kwamba wanapaswa kuwajibika kabla
ya hatua kali zingine kufuata dhidi yao.
Kwa
mujibu wa Mzenga alisema kuwa waratibu hao wameshindwa kuwajibika huku
akionesha wazi kukerwa na majibu yao waliodai kuwa wameshindwa kuleta wanafunzi
hao kwa kuwa hawana fedha za kumudu gharama za mashindano kitu ambacho amekiri
kuwa hakina ukweli wowote kwa kuwa ofisi yake ilitoa agizo kuwa watumie fedha
za ruzuku (Capitation) na pesa za elimu ya kujitegemea (EK).
“Haiingii
akilini kwa viongozi wakubwa wa elimu kama hawa eti washindwe kuleta timu
kutoka kwenye kata zao kwa madai eti hawana fedha…wakati ofisi yangu ilishatoa
maagizo kuwa wawaambie walimu wakuu wa shule zote kwenye kata zao watumie fedha
ya ruzuku inayoletwa na serikali pamoja na michango mingine mbona hawa wenzao
wameweza? Huu ni uzembe na kamwe siwezi kuvumilia”.alisema Mzenga.
Alisema
tayari ofisi yake imeshaandaa barua za wito kwa waratibu hao wanaotakiwa
kuripoti ofisini kwake kwa ajili ya kutoa maelezo ya awali ni sababu gani hasa
za msingi zilizowafanya washindwe kuleta timu za michezo kutoka kwenye kata zao
huku wakijua wazi kuwa kila siku serikali imekuwa ikihimiza michezo mashuleni
ili kupata timu bora za michezo ikiwemo timu ya Taifa.
Alisema sera ya elimu nchini
inasisitiza michezo na kwamba kupitia michezo wanafunzi wanapata stadi
mbalimbali za maisha ikiwemo upendo na umoja miongoni mwao hivyo kwa kitendo
cha wanafunzi wa kata hizo mbili kutoshiriki michezo hiyo ni kuwakosesha moja
ya haki yao ya msingi ya kucheza.
Aidha
alisisitiza kuwa msimamo wake ni kuchukua hatua kali za kinidhamu ili iwe
fundisho kwa viongozi wengine wa elimu ya msingi ndani ya Halmashauri hiyo
watakaoshindwa kuwajibika kwa yale maagizo yote muhimu yanayotolewa na idara
yake huku akiwatangazia kihama kwa lengo la kuwafanya wafanye kazi iliyowaleta
ya kuwahudumia wananchi.
Mwisho.
MWANAFUNZI mwenye ulemavu wa ngozi Samson Charles (JAJA) anayesoma shule ya msingi mchanganyiko Masasi Halmashauri ya Mji wa Masasi akisoma Ngonjera iliyoandaliwa na wanafunzi hao ikiwa ni moja ya burudani wakati wa kufunga mashindano ya Umitashumta hii leo shuleni hapo.
MRATIBU elimu kata wa kata ya Marika Mwalimu Shabani Mkieti akipokea cheti cha ushindi kutoka kwa ofisa elimu msingi wa Halmashauri ya mji wa Masasi Twalibu Mzenga.
MWALIMU mkuu wa shule ya Msingi Chipole Halmashauri ya Mji wa Masasi Haji Ligalawa akionesha cheti cha ushindi baada ya kukabidhiwa na mgeni rasmi wakati wa kufunga mashindano ya UMISHUMTA.
MRATIBU wa Mashindano ya Umoja wa Michezo na Taaluma kwa Shule za Msingi Tanzania (UMITASHUMTA) kwa ngazi ya Halmashauri ya mji wa Masasi kwa mwaka 2015 Mwalimu Jerry Idrissa Njilinji wa shule ya msingi Masasi akisoma majina ya wanafunzi waliochaguliwa kuunda timu ya Halmashauri ya mji wa Masasi.
TANGAZO
Facebook Blogger Plugin by WAYEGE CO.LTD
