TANGAZO
 |
| Hali ilivyokuwa katika eneo la soko la Mkuti baada ya kuteketea kwa moto. |
Na Clarence Chilumba,Masasi.
SOKO kuu la Wafanyabiashara wa
Samaki,dagaa na Mbogamboga maarufu Mkuti
lililopo katikati ya Mji wa Masasi limeteketea lote kwa moto huku baadhi ya maduka yanayolizunguka soko hilo nayo
yakiteketea kwa moto huo na kwamba hadi sasa
chanzo cha moto huo kikiwa bado
hakijafahamika.
Tukio hilo la kusikitisha na
lililoacha simanzi kubwa kwa wafanyabiashara wa mji wa Masasi pamoja na
wananchi kwa ujumla limetokea usiku wa kuamkia leo majira ya saa 4:30 usiku
ambapo moto mkubwa ambao chanzo chake hakifahamiki hadi sasa ulilipuka kwa
nguvu katikati ya soko hilo na kuteketeza kabisa bidhaa za wafanyabiashara hao.
Aidha katika tukio hilo la usiku
vijana ambao walikuja sokoni hapo kwa minajiri ya kusaidia zoezi la uokoaji
walianza kuvunja na kuvamia baadhi ya maduka yaliyokuwa yamezunguka soko hilo
na hatimaye kufanikiwa kupora vitu mbalimbali vikiwemo
magodoro,baiskeli,cherehani pamoja na bidhaa zingine za madukani.
Kufuatia msako mkubwa uliofanywa na
jeshi la polisi wilaya ya Masasi likiongozwa na mkuu wa jeshi hilo wilayani
hapa Azaria Makubi tayari vijana 19 wanashikiliwa na jeshi hilo kwa tuhuma za
kukutwa na baadhi ya bidhaa mbalimbali za wafanyabiashara hao huku upelelezi wa
nyumba kwa nyumba ukiwa bado unaendelea.
BAADHI ya Bidhaa zilizookolewa kwenye maduka ya wafanyabiashara hao wa soko kuu la Mkuti wengine wakipakia kwenye magari kupeleka majumbani mwao.
Akizungumza mara baada ya kutembelea
eneo la tukio mapema hii leo mkuu wa wilaya ya Masasi Bernald Nduta alisema ni
pigo kubwa kwa wafanyabiashara na wananchi kwa ujumla kwa kuwa soko hilo ni
miongoni mwa masoko makubwa mkoani Mtwara linalotoa huduma hata kwa wanannchi
wa wilaya jirani za Nanyumbu,Newala,Ruangwa,Nachingwea,Tandahimba na Liwale.
Alisema serikali ya wilaya ya Masasi
iko pamoja na waathirika wote wa moto huo na kwamba tayari amewaagiza wataalamu
wake wa tathimini wa Halmshauri ya mji wa Masasi kuanza kufanya tathimini za
awali ili kubaini ni hasara ya kiasi gani ambayo wafanyabiashara hao wamepata
kutokana na janga hilo.
Alisema kwa sasa wafanyabiashara hao
waoneshe moyo wa utulivu katika kipindi hiki kigumu kwao huku serikali ya
wilaya kwa kushirikiana na kitengo cha maafa kutoka ofisi ya waziri mkuu
kikiangalia namna ya kukabiliana na suala hilo.
Hali ilivyokuwa jana Usiku majira ya saa 4:30 wakati soko la Mkuti linateketea kwa moto ambao hadi sasa chanzo chake hakijafahamika.
Alisema kwa sasa wafanyabiashara hao
waoneshe moyo wa utulivu katika kipindi hiki kigumu kwao huku serikali ya
wilaya kwa kushirikiana na kitengo cha maafa kutoka ofisi ya waziri mkuu
kikiangalia namna ya kukabiliana na suala hilo.
Kwa mujibu wa mkuu huyo wa wilaya ya
Masasi alisema ni vigumu kuamini lakini imetokea huku akiwaomba wafanyabiashara
wa wilaya jirani kusaidia kuleta chakula kwa ajili ya kuuza kwa kuzingatia kwa
sasa ni kipindi cha mfungo wa Ramadhani ambapo pia ametoa wito kwa
wafanyabiashara hao wasitumie mwanya huo kupandisha bidhaa bei.
DIWANI wa kata ya Mkuti Halmashauri ya mji wa Masasi Mahfoudh S. Ahmed akitoa maelezo kwa mkuu wa wilaya ya Masasi Bernald Nduta alipotembelea eneo la soko hilo kwa lengo la kujionea uharibifu wa mali uliotokea.
“Nawapa pole sana wafanyabiashara mliokusanyika
hapa asubuhi hii kunisikiliza…najua ni kweli inauma kupoteza mali na fedha kwa
mtindo wa aina hii nawaomba muendelee kuwa na moyo wa subira ambao tangu tukio
hili lilipotokea jana usiku mmekuwa nao,serikali tuko pamoja na nyinyi katika
hili”.alisema mkuu wa wilaya ya Masasi.
MKUU wa wilaya ya Masasi Bernald Nduta akiongea na wafanyabishara kwenye eneo la soko la Mkuti lililoteketea kwa moto
BAADHI ya wananchi wakishuhudia uharibifu wa mali uliojitokeza kwenye soko hilo la Mkuti baada ya kuteketea kwa moto jana usiku.
"Katika hatua nyingine tayari kamati
ya ulinzi na usalama ya wilaya ya Masasi ikiongozwa na mkuu wa wilaya imefanya
kikao cha dharura cha kujadili namna watakavyofanya na kwamba tayari kamati
zimeundwa za kufanya tathimini za awali."
WANANCHI wakiwa kwenye eneo la soko kuu la Mkuti kushuhudia kilichokuwa kikiendelea asubuhi ya leo
Alisema changamoto kubwa iliyopo kwa
sasa ni kukosa kwa vifaa vya kuzimia moto kutoka kwenye kitengo
kinachojitegemea cha zimamoto ambao kwa siku za hivi karibuni pampu ya kurushia
maji wakati wa uzimaji wa moto imeharibika na gari hilo la zimamoto kushindwa
kufanya kazi zake zilizokusudiwa.
Alisema tayari wao kama Halmashauri
walishawasiliana na mkuu wa jeshi la Zimamoto mkoani Mtwara ili kutatua tatzo
na ni matumaini yake kuwa mapema gari hilo la zimamoto litakuwa katika hali ya
ubora unaopaswa kuwepo huku akiwaomba wafanyabishara hao kutoa ushirikiano
mkubwa wakati wa kufanya tathimini ili kuepuka watu ambao si wafanyabiashara
kujiingiza kwenye tathimini hiyo.
Nae mkuu wa jeshi la polisi wilaya ya
Masasi Azaria Makubi alisema jeshi lake limejipanga katika kukabiliana na watu
wote ambao wanataka kutumia mwanya huo ili kujipatia mali isivyo halali na
kwamba jeshi lake litafanya msako wa nyumba kwa nyumba ili kubaini bidhaa
nyingi ambazo zimeibiwa jana usiku wakati wa tukio hilo.
Makubi alisema wananchi pia wana
wajibu wa kutoa taarifa kwa jeshi hilo pale watakapobaini mtu yeyote katika
kipindi hiki kuwa na bidhaa za madukani kinyume na utaratibu ili waweze
kuwafikisha polisi na baadae kuwafikisha mahakamani.
MKUU wa Jeshi la Polisi wilaya ya Masasi Azaria Makubi akizungumza na wafanyabishara eneo la soko kuu la Mkuti ambalo limeteketea kwa moto.
Mussa Mnalala ni katibu wa soko kuu
la bidhaa la Mkuti ambalo limeteketea lote kwa moto ambaye kwa upande wake alisema
hadi sasa hawajuia chanzo cha moto huo ni nini na kwamba hata walipowauliza
walinzi wanaolinda sokoni hapo nao pia waneshindwa kuwapa majibu kuhusu chanzo
cha moto huo.
Alisema kwa sasa wanachofanya ni
kumalizia suala la uokoaji wa vifaa vya ujenzi zikiwemo baadhi ya bati na
matofali ambapo baadae jioni hii ya leo watafanya kikao cha uongozi ili
kuangalia ni kiasi gani cha hasara kimepatikana kutokana na moto huo.
Alisema mabanda yote ya biashara za
mama lishe,mbogamboga,dagaa,matunda,viungo,vyakula pamoja na mabanda ya samaki
yote kwa sasa yaneteketea kabisa kwa moto na hakuna kitu chochote
kilichopatikana kama mabaki kutoka kwenye soko hilo.
Kwa mujibu wa Mnalala aliiomba
serikali kufanya haraka tathimini ya hasara ya soko hilo ili nao waweze kufahamu
hatima ya maisha yao baada ya uharibifu huo ambao amekiri kuwa vijana weng wako
katika wakati mgumu kutokana na mikopo ya biashara waliyoikopa kutoka benki na
taasisi zingine za fedha.
Nao baadhi ya wafanyabiashara ambao
mabanda yao ya biashara yameteketea kwa moto na kwa wale ambao wamekuta mabanda
yao yamevunjwa na watu wasiofahamika walisema hali ni mbaya kwao kwa sasa na
hawajui cha kufanya ambapo wameiomba serikali kuwasaidia kwa kile itakachoweza.
Kwa sasa moto katika soko hilo la
Mkuti umetulia ila kilichobaki ni kwa wafanyabishara wa madukaa ambao
walifanikiwa kuokoa baadhi ya bidhaa kuzirudisha majumbani mwao huku jeshi la
polisi likiwaamuru wananchi waondoke kwenye eneo hilo ili wafanyabishara waweze
kufanya kikao cha tathimini.
Hadi sasa tayari viongozi mbalimbali
wa serikali na chama wameshatembelea kwenye eneo hilo la tukio kwa kuwapa pole
wafanyabiashara hao na wananchi kwa ujumla.
Mwisho.
TANGAZO
Facebook Blogger Plugin by WAYEGE CO.LTD
