TANGAZO
 |
| Waziri Lukuvi wakati anaongea na wananchi wa mji wa Masasi. |
Na
Clarence Chilumba, Masasi.
WAZIRI
wa ardhi,nyumba na maendeleo ya makazi Wiliam Lukuvi ameziagiza halmashauri
zote nchini kuharakisha upimaji wa ardhi na mashamba katika maeneo ya wananchi
ambao ndio wamiliki wa asili wa maeneo hayo ili kuondoa migogoro ya ardhi
inayosababisha wananchi kuichukia serikali yao.
Agizo
hilo amelitoa leo wilayani Masasi baada ya kupokea taarifa ya wilaya
iliyosomwa na mkuu wa wilaya hiyo Bernald Nduta ambapo alisema umilikishaji pamoja
na upimaji wa ardhi ndio njia pekee inayoweza kupunguza ama kuondoa kabisa
migogoro huku akikiri kuwa mingi ya migogoro hiyo husababishwa na maofisa wa
ardhi wa Halmashauri nchini.
Alisema
halmashauri zinapaswa kupima ardhi na mashamba kwa lengo la kuongeza thamani ya
maeneo hayo huku akitoa masharti kuwa wakati wa upimaji wa maeneo hayo ni
lazima kuwe na makubaliano ya kisheria kati ya wamiliki na halmashauri na
kwamba pia wanapaswa kulipwa fidia zao za umiliki.
Alisema
tatizo kubwa lililopo katika halmashauri nyingi nchini ni pale wananchi
wanaposhindwa kupewa taarifa wakati wa zoezi la upimaji wa maeneo yao mazingira
ambayo husababisha migogoro ambayo imekuwa kero kubwa kwa wizara ya ardhi.
Kwa
mujibu wa waziri huyo alisema kwa sasa kitu pekee ambacho halmashauri zote
nchini zinapaswa kufanya ni kushirikiana na baadhi ya makampuni ya watu binafsi
ambayo yamekuwa yakifanya kazi za upimaji wa ardhi na mashamba ambayo hulipa
fidia au mradi shirikishi ambao kampuni hupima ardhi na kugawana viwanja kati
ya wamiliki na kampuni husika.
Aidha
aliziasa halmashauri hizo kufanya kazi na kampuni zilizosajiliwa na
zinazotambulika na wizara ya ardhi ili kuepusha usumbufu ambao baadhi ya wilaya
ikiwemo wilaya ya Lindi imezikumba ambapo kampuni ya UTT iliyopima viwanja
ililipa fidia ya shilingi 400,000 kwa wamiliki kwa ekari moja huku kampuni hiyo
ikiuza ekari moja kwa shilingi milioni 16.
Akizungumzia
kuhusu tatizo la uhaba wa watumishi wa idara ya ardhi nchini alisema kwa mwaka
wa fedha wa 2015/2016 serikali imeajiri maofisa wa ardhi, wapimaji na wathamini
wapatao 60 nchi nzima ambao hawatoshi na kwamba ili kurahisha huduma za ardhi
wizara yake imepanga kuleta maofisa hao kwa kila kanda pamoja na kununua vifaa
mbalimbali vya upimaji ambavyo vingi vina gharama kubwa.
Awali
akisoma taarifa ya wilaya kwa waziri huyo mkuu wa wilaya ya Masasi Bernald
Nduta alisema halmashauri ya mji wa Masasi imeweza kuandaa mchoro wa mipango
miji wa eneo la ujenzi wa nyumba za gharama nafuu za shirika la nyumba la Taifa
pamoja na viwanja vya wananchi 30 waliopisha ujenzi wa nyumba hizo.
Alisema
kwa upande wa halmashauri ya wilaya ya Masasi imefanikiwa kwenye mpango wa
urasimishaji wa ardhi ulioanza mwaka 2010 chini ya ufadhili wa Mkurabita na
shirika lisilo la kiserikali la Concern
World wide ambapo hadi sasa jumla ya vijiji 14 vimefanyiwa mpango wa
matumizi bora ya ardhi.
Mwisho.
WAZIRI wa Ardhi Wiliam Lukuvi akimsikiliza mwenyekiti wa CCM wilaya ya Masasi Kazumari Malilo alipotembelea ofisi ya Ardhi ambayo ilichomwa moto.
TANGAZO
Facebook Blogger Plugin by WAYEGE CO.LTD
