TANGAZO
Na
Clarence Chilumba, Masasi.
Wananchi
katika Halmashauri ya mji wa Masasi mkoani Mtwara wameaswa kuendelea kujitokeza
kwa wingi katika zoezi la kujiandikisha katika daftari la kudumu la wapiga kura
kwa kutumia mfumo mpya wa uandikishaji kwa njia ya kielektroniki BVR.
Zoezi
hilo kwa Halmashauri ya Mji wa Masasi lilianza jumatatu April 24 mwaka huu
katika kata za Mtandi, Jida, Chanikanguo pamoja na Mkuti na ambalo litadumu kwa
muda wa siku saba ili kuwezesha wananchi wote wa kata hizo kuweza kujiandikisha
kwa wingi waweze kupata sifa za kushiriki kwenye uchaguzi mkuu ujao pamoja na
zoezi la kuipigia kura ya ndio au hapana katiba inayopendekezwa.
Halmashauri
ya Mji wa Masasi ni miongoni mwa Halmashauri saba zilizopo mkoani Mtwara yenye
jumla ya kata 14 ambapo jumla ya wananchi 83,798 wanatarajiwa kuandikishwa
kwenye zoezi la uboreshaji wa daftari la kudumu la wapiga kura.
Akizungumza
na Blog ya Mtazamo mpya hii leo Kaimu mkurugenzi wa Halmashauri ya Mji wa
Masasi Mzenga Twalibu alisema halmashauri yake imeweka utaratibu maalumu katika
utekelezaji wa zoezi hilo nyeti na kwamba wameamua kuanza kuandikisha wakazi wa
kata nne za Chanikanguo, Jida, Mtandi na Mkuti.
Alisema
jumla ya vituo 28 vilivyopo kwenye kata hizo nne za awali viko kwenye zoezi la
uandikishaji na kwamba hadi sasa zoezi hilo linaendelea vizuri huku akikiri kuwa
ziko baadhi ya changamoto chache zilizojitokeza ambazo ambazo zimekuwa
zikipatiwa ufumbuzi wa haraka kutoka kwa wataalamu wa mifumo kwa ngazi ya halmashauri
ya mji wa Masasi kwa ushirikiano na wale wa kutoka tume ya Taifa ya uchaguzi.
Kwa
mujibu wa Mzenga alisema zoezi hilo kwa kata hizo linatarajia kukamilika april
30 na kwamba kata za Nyasa,Napupa,Marika pamoja na Mumbaka zitafuata na kwamba
baada ya kata hizo zoezi hilo litahamia kwa wananchi wa kata za
Mkomaindo,Migongo na Temeke.
Kata
zingine alizozitaja ambazo zitafuata ili kuhakikisha wananchi wote wa
Halmashauri ya mji wa Masasi wanaandikishwa ni pamoja na kata za Sululu, Mwenge
Mtapika na Matawale ambako zoezi hilo litafikia mwisho.
“Nitoe
wito kwa wananchi wa mji wa Masasi kujitokeza kwa wingi kushiriki kwenye zoezi
hili muhimu kwao na kwa Taifa…wawahi kufika kwenye vituo vyao ambavyo kila mtaa
kipo kituo kimoja ambacho wananchi wa eneo husika wanapaswa kwenda
kujiandikisha,pia nitoe rai kuwa wananchi wasisubiri hadi siku za mwisho”.alisema
Mzenga.
Kwa upande wake Chatoni Chatoni ambaye ni mwananchi wa kwanza
kuandikishwa katika kituo cha JIDA kata ya Jida halmashauri ya mji wa Masasi
alisema vitambulisho hivyo vipya viko tofauti na vile vya awali na kwamba
ameipongeza tume ya Taifa ya uchaguzi kwa uamuzi wa kuleta mfumo mpya wa kupata
vitambulisho vya wapiga kura.
Mwisho.
TANGAZO
Facebook Blogger Plugin by WAYEGE CO.LTD
