WAANDISHI WA HABARI NCHINI WAASWA KUFUATA MAADILI YA TAALUMA ZAO.....

TANGAZO

Na Fatuma Maumba,Mtwara.

WAANDISHI wa habari mkoani Mtwara, wametakiwa kuzingatia na kufuata maadili ya taaluma zao ili waweze kufanya kazi zao kiufanisi bila matatizo yeyote.

Hayo yalisemwa mwishoni mwa wiki na Mwenyekiti wa Chama cha Waandishi wa habari mkoa wa Mtwara (MTPC), Hassani Simba, kwenye majumuisho ya Kikao kazi cha waandishi wa habari kutoka mikoa ya Lindi na Mtwara na Watendaji wa Mfuko wa Maendeleo ya Jamii (TASAF) kilichoandaliwa na TASAF.

Alisema suala la maadili kwa ajili ya waandishi wa habari ni jambo la msingi kwa kila mwandishi wa habari aliyopo kwenye taaluma hiyo na kwamba anapaswa kuzingatia na kufuata maadili ya taaluma yake.

“Suala la maadili kwa ajili ya waandishi wa habari ni jambo la msingi sana kila mwandishi wa habari aliyopo kwenye taaluma hii na anafanya shughuli zake ni lazima azingatie maadili kama yalivyo, kwa sababu vinginevyo mambo mengi yanaweza kutokea taaluma inaweza kudharaulika lakini pia umma tutaupotosha,” alisema Simba na kuongeza:

“Kwa sababu kwenye maadili kuna mambo mengi sana mambo ambayo mwandishi wa habari akiyafanya ambayo ni kinyume, jamii itawaiga…Kwa sababu ukipita sehemu utakuta kundi kubwa la watu wanabishana ukiwauliza hizo habari umesikia wapi watakujibu tumesikia kwenye magazeti au radio na tv, kwaiyo waandishi tuzingatie maadili tusije kuipotosha jamii kwani inatutegemea sisi tuwape habari nzuri na muonekano wa mavazi yetu.

Kwa upande wake Ahmad Mmow, mwandishi wa habari wa gazeti la Raia Mwema, alisema kuwa kwa ujumla kwa mwandishi yeyote anatakiwa kulijua hilo kinachofanyika hapa wanakumbushwa tu na kama kuna watu wanakiuka maadili wanafanya makusudi tu lakini ni jambo ambalo kwa mwanahabari makini anatakiwa kujua, kuzingatia maadili miongoni mwake kutopendelea, kutovutwa na vishawaishi na mwisho wa siku kutenda haki kwa watu wote bila ubaguzi wowote.

Mkurugenzi wa Mfuko wa Maendeleo ya Jamii nchini TASAF Bwana Ladislaus Mwamanga (aliyekaa katikati) akiwa kwenye picha ya pamoja na waandishi wa habari wa mikoa ya Lindi na Mtwara wakati wa kikao kazi cha waandishi hao na maofisa wa TASAF kilichofanyika mkoani Mtwara.

Sospeter Magumba ni mwandishi wa habari na mtangazaji wa Redio Safari mkoani Mtwara, yeye alisema kuwa kimsingi suala ya maadili ya uandishi wa habari ni kitu ambacho wanapewa mwanzoni kabisa wakati unapoingia chuo cha uandishi wa habari.

Alisema eneo la uandishi wa habari na maadili ni kitu cha msingi zaidi kwa sababu kazi yao ni kazi ambayo inabeba maslahi ya jamii lakini pia inatengeneza ustawi wa jamii, kwa hiyo kwa kawaida msingi wa maadili ndio unakuwa msingi zaidi ili mwandishi abaki kuwa salama na amani yake.

Clarence Chilumba ni Mwandishi wa habari wa magazeti ya Uhuru na Habari leo wilayani Masasi, mkoani Mtwara, alisema kuhusu alichoongea Mwenyekiti wa Chama cha waandishi wa habari, mkoani Mtwara (MTPC), Hassani Simba,kuhusiana na maadili ni kweli kabisa kwani kumekuwepo na tatizo kwani wapo waandishi wengi wamekuwa wakikiuka maadili tofauti na taaluma zao.

Chilumba alisema kwa mfano mtu anavyoenda kufanya mahojiano na viongozi hata wakati wa kawaida pia kwenye suala la mavazi waandishi wengi wamekuwa wakivaa mavazi yanayoenda kinyume na maadili yao.

Alisema siku zote jamii inawangalia wao kama ni kioo cha jamii sasa wanavyokiuka maadili yao jamii inaweza ikaiga kutoka kwao“Waandishi wa habari ni kama kioo cha jamii kama ilivyo taaluma nyingine kama walimu na watu wengine kwa hiyo mwandishi anapokuwa anafanya tofauti na matarajio ya wengi hilo ni tatizo.

Hata hivyo Chilumba alisema hata suala la lugha ni tatizo kwao kwani wanavyoenda kufanya mahojiano na watu waangalie sana makundi kwa mfano watoto wenye matatizo maalumu, majeruhi pamoja na watu waliofiwa wanatakiwa watumie lugha ya busara hili wasiwakwaze wale watu ambao wanaenda kufanya mahojiano nao.

Bwana LADISLAUS MWAMANGA mkurugenzi wa TASAF akiwa kwenye picha ya pamoja na waratibu wa mpango wa kunusuru kaya maskini kutoka wilaya za mikoa ya Lindi na Mtwara.

Bwana Ladislaus Mwamanga ambaye ni mkurugenzi wa TASAF wakati anafungua kikao kazi cha waandishi wa Habari pamoja na maofisa wa TASAF kilichofanyika mkoani Mtwara Kulia kwake ni Mratibu wa TASAF mkoa wa Mtwara Monika Mahundi

Mariam Maregesi ni mwandishi wa habari wa gazeti la Nipashe, mkoani Mtwara, yeye alisema kwamba suala la maadili kwa waandishi wa habari wakati mwingine wanaenda ndivyo sivyo kwa sababu mwandishi anaenda kumuona mtoa habari lakini anaombwa ampatie muda ili aweze kuandaa taarifa vizuri yeye anataka hiyo taarifa aipate wakati huo huo kitendo ambacho hakiwezekani.

Maregesi alisema wakati mwingine anakuelekeza vizuri lakini mwandishi kwa kujiona kila kitu ndio wewe wamekuwa wakiwatishia watoa habari kuwa wataandika anavyojuwa yeye kiukweli hapo wanakuwa wanaenda kinyume na uandishi wa habari.

Waandishi wa Habari kutoka mikoa ya Lindi na Mtwara wakifuatilia kwa makini hotuba ya mkurugenzi wa TASAF wakati wa kikao kazi kilichofanyika hivi karibuni mkoani Mtwara.

Aidha Maregesi alikemea tatizo la uvaaji mavazi hasa kwa waandishi wa

Kike,

“Waandishi wa habari hasa wanawake wamekuwa wakijidhalilisha kwa vyanzo vyao vya habari mwanamke unaenda umevaa nguo ya ajabu sehemu zako ambazo ni nyeti wakati mwingine zinaonekana ukifika pale unafukuzwa na yule mtoa habari inakuwa haitujengi isipokuwa inabomoa maadili ya uandishi wa habari,”alisema Maregesi na kuongeza:

“Unapokuwa kama mwandishi wa habari ni chombo ambacho watu wengi wanategemea kwa hiyo jamii inategemea kuiga mema kutoka kwako lakini sasa unavyoenda kwa chanzo chako cha habari umevaa vibaya unamjengea nini nia yako, kiukweli kimsingi waandishi wa habari tunatakiwa sana tuzingatie maadili yetu hili na sisi tuweze kuheshimika kwa vyanzo vyetu vya habari na jamii kwa ujumla.

Mwisho.