| Mtazamo Mpya

TANGAZO

VIJANA WAUNGANA KUPAMBANA NA UHARIBIFU WA MAZINGIRA.

Na Clarence Chilumba, Masasi.

Vijana wapatao 16 wa eneo la Masasi Mbovu wilayani Masasi katika mkoa wa Mtwara wameungana kuunda kikundi cha ubunifu na utengenezaji wa vifaa vya majumbani, ofisini pamoja na viwandani kwa kutumia malighafi itokanayo na chuma pamoja na aluminiamu badala ya mbao.

Kikundi hicho ambacho hasa lengo lake kuu ni kupambana na uharibifu wa mazingira utokanao na ukataji ovyo wa misitu kwa ajili ya kujipatia mbao pamoja na bidhaa zingine zitokanazo na misitu na kwamba kimepewa jina la vitendo kwanza maarufu kama vikwa.

Aidha vijana hao wamefikia hatu hiyo ya utengenezaji wa vifaa mbalimbali kwa kutumia chuma baada ya kuona wilaya ya masasi ni miongoni mwa wilaya mkoani Mtwara ambazo suala la uharibifu wa mazingira utokanao na ukataji miti lipo kwa kiasi kikubwa hali inayopelekea kuhatarisha uhai wa viumbe vitegemeavyo misitu hiyo.

Akizungumza katika mahojiano maalumu na mwandishi wa habari hii mwenyekiti wa kikundi hicho cha vitendo kwanza Maulidi Hokororo maarufu Ndege alisema wamekuwa wakitengeneza fenicha za majumbani, maofisini pamoja na vifaa vya viwandani kwa kutumia chuma na aluminiamu badala ya mbao ambazo husababisha uharibifu wa mazingira.

Alisema kuwa vifaa ambavyo hutengenezwa na kikundi hicho ni pamoja na vitanda, meza, milango, madirisha, viti vya majumbani na vile vya harusi, makabati, pamoja na mashine mbalimbali za ufyatuaji matofali na kwamba vifaa hivyo vyote hutengenezwa kwa chuma.

Kwa mujibu wa mwenyekiti huyo alisema kiwanda hicho pia hurekebisha bodi za magari,uundaji upya wa mfumo wa magari pamoja na utenegenezaji wa madawati na mabanda yanayotumika kwa ajili ya utoaji wa huduma za pesa kupitia mitandao ya simu.

Akizungumzia kuhusu ni kwa namna gani wanakabiliana na uharibifu wa mazingira Hokororo alisema serikali imekuwa ikiwalalamikia wanannchi wa maeneo mbalimbali hapa nchini kuwa wemekuwa na tabia za ukataji misitu kwa ajili ya matumizi ya utengenezaji wa fenicha za majumbani na kwamba wao kwa kutumia chuma katika utengenezaji wa fenicha hizo ni dhahiri wanapambana na uharibifu wa mazingira.

Alisema matarajio yao ni kuona jamii inabadilika na kuachana na tabia ya uharibifu wa mazingira kwa kukata miti kwa matumizi ya fenicha mbalimbali za majumbani na badala yake waanze kuwa na utamaduni wa kuagiza fenicha zinazotengenezwa kwa kutumia malighafi zitokanazo na chuma ambazo bei yake ni ya kawaida.

Aidha matarajio mengine ni kufungua shule ya ufundi wa utenegenezaji wa vifaa hivyo, kujiongezea kipato, kubadili mwelekeo wa vijana ambao siku zote hukaa vijiweni pamoja na kubadilisha mtazamo na fikra za jamii kwamba si lazima wanunue fenicha kutoka nchini china.

Alizitaja changamoto wanazokumbana nazo katika utendaji wa kazi zao ikiwa ni pamoja na ufinyu wa soko la bidhaa zao, ofisi za serikali na watu binafsi kuagiza vifaa vya maofisini na majumbani kutoka Dar es Salaam ambavyo vingi kati ya hivyo vimetengenezwa nchini china ambavyo mara nyingi huwa sio imara.

Mwisho.

Moja ya mafundi wa kikundi hicho cha Vitendo kwanza akitengeneza mlango wa chuma

Baadhi ya vifaa vilivyotengenezwa na kikundi cha VIKWA kwa kutumia malighafi ya chuma na Aluminiamu.

Kitanda cha chuma kilichotengenezwa na mafundi hao kiwandani hapo kinachouzwa kiasi cha fedha Tsh;Milioni moja.

Mr.Maulidi Hokororo (Ndege) ambaye ni mwenyekiti wa kikundi cha vitendo kwanza akiwa amekalia kiti cha kisasa ambacho kina sehemu ya kuwekea (Droo) kompyuta mpakato (LAPTOP) pamoja na Document zingine muhimu huku mbele ya kiti hiko kukiwa na meza.