TANGAZO
Mwenyekiti wa Chama Cha Demokrasia na maendeleo Chadema Mkoa wa Mtwara Kassim Bingwe (Kushoto) aliyeshika karatasi yenye maneno Time For Change.
Na Clarence Chilumba,Masasi.
Baada ya mvutano wa muda mrefu wa vyama
vinavyounda Umoja wa Ukawa wa kuachiana majimbo wilayani Masasi hatimaye mwenyekiti wa chama cha demokrasia na
maendeleo Chadema mkoa wa Mtwara Kassim
Bingwe ameweka wazi msimamo wa chama chake kuwa
mgombea halali wa umoja huo kwa nafasi ya ubunge jimbo la Masasi ni
mwenyekiti mwenza wa Ukawa Dkt.Emanuel
Makaidi.
Aliyasema hayo jana wakati wa uzinduzi wa kampeni za chama cha NLD
ambacho mwenyekiti wake wa taifa ni
Dkt.Makaidi na anagombea nafasi ya
ubunge jimbo la Masasi kupitia Ukawa uzinduzi uliofanyika kwenye
viwanja vya Terminal two maarufu uwanja wa fisi.
Alisema baadhi ya
viongozi wa vyama vinavyounda umoja huo
wamekuwa wakimbeza Dkt.Makaidi na kuonesha dharau dhidi yake na kwamba
wanaofanya vitendo hivyo ni dhahiri hawamjui Makaidi na hawajui Siasa na
mchango mkubwa alionao kwenye umoja wa katiba ya wananchi Ukawa.
Alisema wananchi wa wilaya ya Masasi pamoja na viongozi wote wa
Ukawa wanapaswa kumuunga mkono Makaidi katika harakati zake za kuomba ridhaa
kwa wananchi wa jimbo la Masasi ili aweze kushinda kwenye uchaguzi mkuu ujao
oktoba mwaka huu.
Kwa mujibu wa mwenyekiti huyo wa Chadema mkoa wa Mtwara alisema
kitendo kinachofanywa na baadhi ya viongozi wa vyama vinavyounda umoja huo
wilayani humo cha kumkejeli na kumkataa Makaidi tena mbele ya viongozi wa juu
wa Ukawa ni kuirahisishia CCM ili iweze kupata ushindi wa kishindo.
“Ndugu zangu wana Ukawa Wilayani Masasi mnachopaswa kufahamu ni
kuwa Dkt.Emanue Makaidi ni mwenyekiti mwenza wa Ukawa…lakini pia ni miongoni
mwa wanasiasa wakongwe nchi hii hivyo mnapaswa kumuheshimu kama baba yenu
kwenye majukwaa ya kisiasa na kwamba hiki mnachofanya hakipaswi kuachwa
kikiendelea”.alisema Bingwe.
Aidha Bingwe amewajia juu baadhi ya viongozi wa umoja huo
wilayani hapa wanaohoji uhalali wa
Makaidi kugombea ubunge jimbo la Masasi kwa kigezo kuwa maisha yake ni Dar es
salaam huku akihoji kuwa mbona mwenyekiti wa Chadema taifa Kamanda Freeman
Haikael Mbowe anaishi Dar es salaam lakini ni mbunge wa Hai na wananchi wake
wamemkubali?
Alisema makubaliano ya Ukawa ni kuachiana majimbo na sio
kushindanisha wagombea kama baadhi ya watu wanavyosambaza uvumi kuwa Ukawa
wamekubaliana kushindanisha wagombea na kuangalia mgombea gani anakubalika au
anashangiliwa sana na wananchi wa eneo husika.
Alisema ukweli ni kwamba Dkt.Emanuel Makaidi ndie mgombea halali
na anayetambulika na umoja wa Ukawa na kwamba hao wagombea wengine wanaoendelea
na mchakato wa kampeni ndani ya jimbo hilo wanajidanganya na kupoteza muda wao huku
akiapa mbele ya maelfu ya wananchi waliohudhuria mkutano huo kuwa chama chake
kitatoa ushirikiano wakati wote wa kampeni za Dkt.Makaidi.
Kassim Bingwe akiwa kwenye moja ya mikutano ya kuimarissha chama cha Demokrasia na maendeleo Chadema wilayani Masasi katika eneo la Mti Mwiba.
Katika
jimbo la Masasi viongozi wa umoja huo wamevunja makubaliano waliyoyaweka wenyewe huku
kila chama kikisimamia msimamo wake kwa kusimamisha mgombea ingawa makubaliano
ya umoja wa ukawa ngazi ya juu na yaliyosainiwa na viongozi wa umoja huo taifa
jimbo la Masasi wameachiwa Chama cha NLD.
Mvutano
mkubwa uliopo ni kati ya mgombea wa chama cha NLD Dkt.Emanuel Makaidi na
mgombea wa CUF Ismail Makombe (Kundambanda) ambaye anaonesha kuungwa mkono na
wanachama wa vyama vinavyounda umoja wa Ukawa wilayani humo.
Katika
hatua nyingine mara baada ya mkutano huo,habari leo ilimtafuta katibu wa chama
cha wananchi CUF wilaya ya Masasi Hassan Chaliche ili aweze kueleza msimamo wake juu ya mvutano huo na kusema kuwa kwa hali ilivyo sasa
Ukawa Masasi uko kwenye mgogoro mkubwa.
Alisema
kuwa mgombea wao wa CUF Ismail Makombe ataendelea kufanya kampeni kwani yeye
ndie anayekubalika na wananchi wa Masasi na kwamba kauli iliyotolewa na
mwenyekiti huyo wa Chadema hawakubaliani nayo.
Alipotakiwa
kutoa ufafanuzi ni kwa nini anakinzana na makubaliano yaliyosainiwa na viongozi
wao wa juu na kutolewa kwa vyombo vya habari Chaliche alisema wao wamepokea
maagizo kutoa kwa uongozi wa juu wa CUF kuwa mgombea wao aendelee na mchakato
wa uchaguzi ndani ya jimbo hilo.
Septemba mosi mwaka
huu mgombea mwenza wa urais kupitia umoja
unaounda Ukawa Juma Duni Haji alishindwa kumaliza mgogoro unaoendelea
katika jimbo la Masasi kuhusu nani mgombea ubunge rasmi anaegombea kupitia
umoja huo.
Hali hiyo
ilisababisha baadhi ya wananchi wanaodhaniwa kuwa na mapenzi wa mgombea wa CUF
Ismail Makombe kuanza kuzomea jukwaa kuu la viongozi wa umoja huo akiwemo Duni
na hatimaye mkutano huo kuvunjika na vijana kuingia barabarani wakiimba nyimbo
za kumkataa Makaidi na kumkubali Kundambanda.
TANGAZO
Facebook Blogger Plugin by WAYEGE CO.LTD
