TANGAZO
Na Clarence Chilumba,Masasi.
Mwenyekiti wa Halmashauri ya mji wa
Masasi mkoani Mtwara Andrew Mtumusha amewaagiza walimu wakuu wa shule za msingi
wa kata ya Marika mjini humo yenye shule sita kupeleka majina ofisi ya
mkurugenzi ya walimu ambao hawaishi katika vituo vyao vya kazi ili hatua kali
za kisheria na kinidhamu zichukuliwe
dhidi yao.
Aidha ametoa onyo kali kwa maofisa
watendaji wa vijiji,wenyeviti wa vitongoji pamoja na ofisa mtendaji kata wa
kata hiyo ya Marika Halmashauri ya mji
wa Masasi kuwa atakayeshindwa kusimamia agizo hilo ni bora aandike barua
mwenyewe kwa mkurugenzi wa mji ya kuacha kazi kabla mkono wa sheria
haujamfikia.
Pia amekemea vikali vitendo vya wizi
wa vifaa vya kompyuta mpakato vilivyotolewa kama msaada kwenye shule za msingi
za Halmashauri hiyo kutoa shirika la maendeleo la Marekani (USAID) kupitia
programu ya elimu ya msingi kwa karne ya ishirini na moja-Tz 21 na kwamba
watakaobainika watafikishwa mahakamani.
Aliyasema hayo jana wakati wa hafla
fupi ya uhamasishaji kusoma vitabu pamoja na majarida mbalimbali katika shule za msingi mkoani Mtwara hafla
iliyofanyika katika viwanja vya shule ya msingi Mumbaka kata ya Marika
Halmashauri ya mji wa Masasi na kuratibiwa na Taasisi ya Better Foundation
chini ya udhamini wa Tz 21.
Alisema walimu wengi wa shule za
msingi wa kata hiyo wamekuwa wakiishi
nje ya vituo vyao vya kazi kwa kigezo kuwa wako jirani na makao makuu ya
Halmashauri hiyo ambapo ameweka wazi msimamo wake kuwa hatokubali kwa mwalimu
yeyote ambaye yuko nje ya kituo chake cha kazi aendelee kuishi huko.
Alisema kuwa licha ya uhaba wa nyumba
za walimu kwenye baadhi ya shule za msingi za kata hiyo lakini bado nyumba za
kupanga zipo kama hizo ambazo wengi wao wamepanga Mjini na kwamba kwa sasa
karibu vijiji vyote vya Halmashauri hiyo ziko nyumba bora na za kisasa za watu
binafsi ambazo walimu hao wanaweza kupanga na kuishi kama wanavyoishi mjini.
Kwa mujibu wa Mtumusha alisema
Halmashauri yake kwa kushirikiana na serikali kuu iko mbioni kuanza ujenzi wa nyumba za walimu
kwenye shule za msingi ambazo tatizo ni kubwa hivyo ametoa rai kwa walimu wakuu
wa shule hizo waanze uhamasishaji wa ufyatuaji wa matofali mara baada ya
kipindi cha masika kumalizika.
Akizungumzia kuhusu suala la wizi wa
vifaa vya kielektroniki vilivyotolewa na USAID kama msaada kwa shule za msingi
za Halmashauri hiyo alisema kwa sasa ifike mwisho kwa watu wote wanaojihusisha
na vitendo hivyo visivyo vya kiungwana kwa wafadhili hivyo ni vyema jamii ikawa
mlinzi wa vifaa hivyo.
“Hatuwezi kupewa msaada wa vifaa vya kompyuta kwa watoto wetu ili
waendane na mabadiliko ya sayansi na teknolojia….halafu kuwe na watu wachache
wanaoiba vifaa hivyo huku wananchi mkikaa kimya kwa kuwa hao wanaoiba wengine
ni watoto wenu,rafiki zenu na ndugu zenu…hivyo naagiza kwa watendaji wa vijiji
kusimamia hilo na atakayeshindwa aache kazi”.alisema.
Akijibu malalamiko yaliyotolewa
kwenye risala iliyosomwa na mwanafunzi Martha Alex (8) wa darasa la pili wa
shule ya msingi Mumbaka kuhusu wanafunzi wa elimu ya awali shuleni hapo kusomea kwenye nyumba ya
mwalimu,Mtumusha alisema Halmashauri itajenga darasa hilo la awali mara baada
ya kipindi cha mvua kumalizika huku akitoa wito kwa wazazi kuchangia ujenzi wa
darasa hilo.
Hata hivyo ili kuhamasisha ujenzi wa darasa hilo mwenyekiti wa
Halmashauri ya mji wa Masasi aliendesha harambee ndogo iliyokuwa na mafanikio
makubwa kwani jumla ya ahadi ya mifuko ya saruji 31,bati tano,boriti 4 pamoja
na fedha shilingi 25,000 zote zikiwa ni ahadi zilipatikana.
Mwisho.
MKURUGENZI wa Better Nation Foundation Hans Gabriel akizungumza wakati wa Hafla fupi iliyokuwa na lengo la kuhamasisha usomaji wa vitabu kwenye viwanja vya shule ya msingi Mumbaka.
Gari inayobeba vifaa pamoja na wasanii wa kikundi cha Better Nation Foundation kinachotoa burudani yenye lengo la kuhamasisha wananchi umuhimu wa kusoma vitabu.
Mwanafunzi wa shule ya msingi Mumbaka MARTHA ALEX mwenye umri wa miaka 8 anayesoma darasa la pili shuleni hapo akisoma Risala kwa mgeni rasmi wakati wa sherehe za uzinduzi wa wiki ya uhamasishaji wa kusoma. Mtoto huyo ni matunda ya Programu ya Tz 21 na kwamba malengo yake ni kuja kuwa mwalimu wa shule ya Sekondari hapo baadae.
WANAFUNZI kutoka kwenye shule mbalimbali za kata ya Marika wakicheza muziki kwa furaha mara baada ya uzinduzi wa zoezi la uhamasishaji wa kusoma katika Halmashauri ya mji wa Masasi Mkonai Mtwara.
Better Nation wakiwa kwenye burudani ili kutoa hamasa kwa jamii kusoma vitabu
TANGAZO
Facebook Blogger Plugin by WAYEGE CO.LTD
