HII NI AIBU KWA BAADHI YA WAFANYABIASHARA WA STENDI KUU YA MABASI MJINI MASASI

TANGAZO

 Na Clarence Chilumba,Masasi.

IMEBAINIKA kuwa baadhi ya wafanyabiashara wa eneo la stendi kuu ya mabasi mjini Masasi  wasiokuwa na vitendo vya kiustaharabu wamekuwa na tabia ya kujisaidia haja ndogo (MKOJO) kwenye chupa za maji na hatimaye kutupa chupa hizo kwenye vichochoro vilivyopo katika mabanda yao ya biashara.

Uchunguzi uliofanywa na “MTAZAMO MPYA” umebaini kuwa maeneo mengi yenye vichochoro katikati ya mabanda yaliyopo stendi kuu ya mabasi mjini Masasi yamekuwa maficho ya uchafu na vyupa vya mkojo na mengine hata kinyesi cha binadamu hupatikana.

Aidha tabia nyingine iliyobainika ni kuwepo kwa uchafu kwenye mifereji inayopitisha maji machafu kunakosababishwa na baadhi ya wafanyabiashara hao kutupa takataka kama vile chupa tupu za maji,mifuko ya plastiki,pamoja na matairi yaliyoisha  kwenye mifereji hiyo.

Hayo yamebainika leo wakati wa zoezi la usafi linaloendelea kufanywa kwenye maeneo mbalimbali ya Halmashauri ya mji wa Masasi katika maadhimisho ya wiki ya Wanawake duniani yaliyoanza siku ya jumapili na yanatarajia kukamilika ifikapo machi nane 2015.

Wakizungumza baadhi ya wafanyabiashara hao wamestushwa kuwepo kwa vitendo hivyo visivyo vya kiungwana na kwamba hawajui ni nani amekuwa na tabia hiyo licha ya kuhaidi kuendelea kuwatafuta wanaohusika na uchafuzi huo.

Katika Hatua nyingine chama cha mawakala wa usafirishaji abiria katika magari yaendayo mikoani na wilayani kimeanzisha utaratibu wa usafi kwenye eneo hilo la stendi kwa kudhibiti wote wanaotupa uchafu kwenye eneo hilo na kwamba yeyote atakayebainika hatua kali zitachukuliwa dhidi yake.

Miongoni mwa mikakati iliyopo ni pamoja na kuhakikisha kuwa takataka zote zinawekwa kwenye eneo maalumu la kukusanyia ili wafanyakazi wa Halmashauri ya mji wa Masasi wanaozoa taka wazoe kwa urahisi.

WITO: JUKUMU LA USAFI SI LA HALMASHAURI PEKEE,NI LA KILA MWANANCHI WA MJI WA MASASI.HAKIKA TUKISHIRIKIANA KIKAMILIFU MJI WA MASASI UTAKUWA MSAFI WAKATI WOTE KWA FAIDA YETU WOTE.

“AIDHA MKURUGENZI WA HALMASHAURI YA MJI WA MASASI ANAWAKUMBUSHA KUWA KILA IFIKAPO JUMAMOSI YA MWISHO WA MWEZI ITAKUWA NI SIKU YA USAFI”

 Chupa zenye mkojo zilizokutwa kwenye mabanda yaliyopo kwenye eneo la stendi kuu ya mabasi yaendayo mikoani na wilayani katika mji wa Masasi zilizotupwa na wafanyabiashara wa eneo hilo.

 Akinamama wakiwa kwenye zoezi la usafi linaloendelea mjini masasi wakiondoa chupa pamoja na mifuko ya plastiki  iliyotupwa kwenye mifereji inayopitisha maji machafu katika eneo la stendi kuu ya mabasi  mjini Masasi katika kuadhimisha maadhimisho ya wiki ya wanawake duniani.

 Mzee ambaye jina lake halikuweza kupatikana mara moja akiwa kwenye zoezi la usafi wa mazingira hii leo katika eneo la stendi kuu ya mabasi mjini Masasi.

 Akinamama waliojitokeza kwenye zoezi la usafi wakiwa wameshikwa na mshtuko baada ya kukuta matairi yaliyoisha yakiwa yametupwa ndani ya mifereji inayopitisha maji machafu katika eneo la stendi kuu ya mabasi mjini masasi wakati wa zoezi la usafi.

TANGAZO

Facebook Blogger Plugin by WAYEGE CO.LTD

Wednesday, 4 March 2015