DC MASASI BERNALD NDUTA AOMBA USHIRIKIANO KWA WANANCHI NA WATENDAJI

TANGAZO

 Na Clarence Chilumba,Masasi.

Mkuu wa wilaya ya Masasi mkoani Mtwara,Bernald Nduta amewaomba watendaji pamoja na viongozi wa chama na serikali wa Halmashauri zote mbili zinazounda wilaya ya masasi kumpa ushirikiano katika utekelezaji wa majukumu yake.

Ametoa kauli hiyo leo wakati wa kikao cha kamati ya ushauri ya wilaya ya Masasi (DCC) kilichoketi kwa ajili ya kujadili mambo mbalimbali yahusuyo maendeleo moja wapo likiwa ni kuangalia na kufanya marekebisho katika mapendekezo ya rasimu za mpango wa bajeti kwa Halmashauri zote mbili kwa mwaka wa fedha wa 2015/16.

Alisema katika kutekeleza majukumu yake  viongozi wa dini na wale wa kimila wana nafasi ya kutoa mawazo yao pale wanapodhani kuwa panastahili lengo likiwa ni kuifanya wilaya ya Masasi kubaki kileleni kwa mafanikio mbalimbali.

Aidha ameweka wazi msimamo wake kuwa ofisi yake iko wazi kwa  wakati wowote katika  kusikiliza kero za wananchi kwa kuwa ameletwa wilayani Masasi kwa kazi moja tu ya kuhudumia wananchi waliokiweka madarakani chama tawala.

Kwa mujibu wa mkuu huyo wa wilaya ya Masasi alisema wilaya ya Masasi ni miongoni mwa wilaya ambazo wakuu wengi wa wilaya waliopita wamekuwa na mafanikio makubwa katika uongozi na kwamba hata yeye anahitaji atoke Masasi akiwa na sifa zitakazomwezesha kuwa kiongozi wa juu nchini.

Alisema katika utendaji kazi kwenye Halmashauri yoyote nchini ni lazima kuwe na ushirikiano miongoni mwa watendaji, madiwani,viongozi wa vyama vya siasa,viongozi wa dini pamoja na viongozi wa kimila na kwamba bila ushirikiano itakuwa ni kujidanganya.

“Mimi ni kiongozi kama viongzoi wengine…kuwa mkuu wa wilaya hainifanyi kuwa tofauti na wananchi waliokiweka chama tawala madarakani,ni kweli kuwa wapo baadhi ya viongozi wakipata madaraka hudharau watu,hushindwa kusalimia lakini mimi nahaidi mbele yenu kuwa siko hivyo na karibuni ofisini kwangu”.alisema Nduta.

Alisema nitahakikisha kuwa nafanya maamuzi kwa kuzingatia misingi na kanuni zilizowekwa bila kubagua mtu yoyote na kwamba iko haja pia kwa watendaji wa halmashauri zetu mbili kufanya kazi kwa weledi mkubwa kwa lengo la kutoa huduma bora kwa wananchi.

Akizungumzia kuhusu daftari la kudumu la wapiga kura,alisema ziko taarifa kuwa wapo baadhi ya watu wanaowashiwishi wananchi wasijitokeze kwenda kujiandikisha kwenye daftari la kudumu la wapiga kura kwa madai kuwa wakati wa uchaguzi watatumia vitambulisho vyao vya awali.

Alisema kauli hizo si za kweli na kwamba ukweli ni kuwa tume ya taifa ya uchaguzi inaandikisha wananachi upya kwa kutumia mfumo mpya na wa kielekrtoniki wa BVR unaotambua macho pamoja na alama za vidole ambapo kwa atakayeshindwa kujiandikisha basi atakuwa amekosa sifa ya kuipigia kura katiba inayopendekezwa pamoja na uchaguzi mkuu ujao.

Kuhusu elimu,Nduta amewaagiza maofisa watendaji wa kata na vijiji kufanya msako wa nyumba kwa nyumba kuwabaini watoto wote ambao hawajaripoti shuleni hadi sasa na atakayeshindwa kutimiza jukumu lake basi atafute shughuli mbadala ya kufanya.

Pia amewaagiza wakurugenzi wa Halmashauri ya mji wa Masasi pamoja na Halmashauri ya wilaya ya Masasi kuhakikisha kuwa wanakamilisha ujenzi wa maabara ifikapo machi 30 mwaka huu ili kuendana na agizo alilolitoa mkuu wa mkoa wa Mtwara Halima Dendego wakati wa ziara yake wilayani humo ilizozitaka halmashauri zote kukamilisha ujenzi huo.

Mwisho.

 MKUU wa wilaya ya Masasi Bernald Nduta akisalimiana na kaimu mkurugenzi wa Halmashauri ya mji wa Masasi Eng:Silaji Mbuta wakati anawasili kwenye kikao cha kamati ya ushauri ya wilaya ya Masasi hii leo. Kushoto kwake ni mwenyekiti wa Halmashauri ya wilaya ya Masasi Juma Satma

 Mkuu wa wilaya ya Masasi Bernald Nduta akipeana mikono na mjumbe wa Halmashauri kuu ya Taifa CCM Ramadhani Pole mara baada ya kumalizika kwa kikao cha kamati ya ushauri ya wilaya ya Masasi hii leo katika ukumbi wa Miduleni.

Mheshimiwa Bernald Nduta mkuu wa wilaya ya Masasi akitoa ufafanuzi wa jambo kwa mwenyekiti wa CCM wilaya ya Masasi Kazumari Malilo (simba wa yuda-mwenye Balagashia) mbele yake ni katibu tawala wa wilaya ya Masasi Danford Peter.

TANGAZO

Facebook Blogger Plugin by WAYEGE CO.LTD

Thursday, 5 March 2015