MKUU WA MKOA WA LINDI AWATAKA WAKUU WAPYA WA WILAYA KUACHA TABIA YA KUKAA OFISINI

TANGAZO

Na Fatuma Maumba,Lindi.

Wakuu wa wilaya wapya wametakiwa kuacha tabia ya kukaa ofisini na badala yake waende kuwatembelea wananchi katika maeneo yao ili waweze kujua matatizo yao.

Aidha wameombwa kutokata tamaa kutokana na  uchanga wao kwenye nyadhifa hizo walizopewa na badala yake wapate muda wa kutosha wa kutembelea maeneo yao ya kata na vijiji  kwa lengo la kukutana na wananchi ili wasikilize kero na malalamiko yao.

Mkuu wa Mkoa wa Lindi, Mwantumu Mahiza alitoa kauli hiyo juzi  wakati akiwaapisha wakuu hao wapya wa wilaya za Ruangwa na Nachingwea na kuwataka kufanyakazi kwa ufanisi bila ya matatizo yoyote.

Alisema muda wa kukaa ofisini kwa viongozi wa umma umekwisha ambapo amewataka kutembelea na kukagua miradi ya serikali ambayo mabilioni ya fedha yameelekezwa huko kwa kuwa  wananchi wana matarajio makubwa sana na serikali yao.

“Ofisi zenu ziwe ni ofisi za wananchi kuja kutoa kero zao wapeni nafasi za kuwasikiliza msiwakimbie,acheni kujigeuza miungu watu… kwa kuwa  serikali hii imewekwa madarakani na wananchi ambao  ndio watakao irudisha tena madarakani tunahitaji kuwa nao karibu”.alisema Mahiza.

Kwa upande wao wakuu wapya Mariam Mtima Mkuu wa Wilaya ya Ruangwa na Pololet Mgema, Mkuu wa Wilaya ya Nachingwea, wamesema watahakikisha wanasimamia elimu, kilimo bora pamoja na afya kuhakikisha vinaenda vizuri.

 Walisema wanazo taarifa kuwa  suala la elimu liko chini sana na kimsingi hata watoto ambao wamechaguliwa kujiunga kidato cha kwanza mwaka huu ni asilimia ndogo tu ndio walioripoti na kwamba wamehaidi watahakikisha wanawahamasisha wazazi wawaruhusu watoto wao wakapate elimu kwani hiyo ndio haki yao kwa ajili ya maisha yao ya baadae. 

Mwisho.

TANGAZO

Facebook Blogger Plugin by WAYEGE CO.LTD

Friday, 27 February 2015