TANGAZO
 |
| Ofisa Mawasiliano (Mkurabita) Gloria Mbilimonywa. |
Halmashauri
ya wilaya ya Mtwara ni miongoni mwa Halmashauri hapa nchini zilizonufaika na
mpango wa kurasimisha rasilimali (Ardhi) na biashara za wanyonge Tanzania
(MKURABITA) mpango uliotekelezwa katika kipindi cha mwaka 2011/2012.
Katika
utekelezaji wa mpango huo Halmashauri ilipokea zaidi ya shilingi milioni 47
lengo likiwa ni kuwapa nguvu za kiuchumi wananchi wa mkoa huo hasa wale wenye
kipato cha chini kwa kuwaongezea uwezo wa kumiliki rasilimali walizonazo
sambamba na kufanya biashara katika mfumo rasmi na wa kisasa zaidi wenye tija
kiuchumi.
Miongoni
mwa mafanikio yaliyopatikana kutokana na mpango wa Mkurabita ni pamoja na
kuongeza usalama wa kumiliki ardhi miongoni mwa wananchi waishio vijijini,kuongeza
uelewa kwa wananchi juu ya umuhimu wa kumiliki ardhi kisheria pamoja na
kupatikana kwa hati miliki za kimila kwa wananchi hao.
Akitoa
taarifa ya utekelezaji wa mpango wa kurasimisha rasilimali ardhi kwa wilaya ya
Mtwara jana mbele ya maofisa mawasiliano waliofanya ziara wilayani hapo ofisa
ardhi wa Halmashauri hiyo Johnia Rwebangira alisema mpango huo ulianza novemba
2011 na kumalizika aprili 2012 na kwamba ili kufanikisha Halmashauri ilishirikiana
na wataalamu kutoka ofisi ya Raisi.
Alisema
upimaji wa mashamba uliofanyika kwa siku 21 uliwezesha kupimwa kwa kijiji cha
Mkunwa na Shaba ambapo jumla ya wananchi wapatao 561 walipimiwa mashamba yao
huku mashamba 600 yakipimwa na kuandaliwa sambamba na kusajiliwa katika daftari
la usajili la hati miliki za kimila.
Rwebangira
alisema kwa sasa mji wa Mtwara unakua kwa kasi kutokana na kuwepo kwa ongezeko
kubwa ka watu linalotokana na ugunduzi wa gesi asilia mkoani humo na kwamba ni
vyema wananchi wa mkoa wa Mtwara wakapima maeneo yao waweze kupata hati miliki
za kimila.
Alisema
licha ya kuwepo kwa mafanikio hayo ya mpango huo bado ziko changamoto kadhaa
zinazoathiri mpango huo zikiwemo taasisi za fedha kutozipokea hati miliki za
kimila kwa kuziona kuwa hazina hadhi sawa na zile zinazotolewa na kamishna wa
ardhi pamoja na ukosefu wa fedha kwa ajili ya uendelezaji wa shughuli za
urasimishaji ardhi ili kuwezesha wananchi wengi zaidi kuweza kupata hati miliki
za kimila.
Alizitaja
changamoto zingine kuwa ni kugawanyika kwa vijiji mara kwa mara ambapo katika
kipindi cha mwaka 2013/2014 Halmashauri ya wilaya ya Mtwara ilikuwa na jumla ya
vijiji 157 na kata 28 na kwamba kwa sasa Halmashauri hiyo ina vijiji 206 na
kata 38.
Kwa
upande wake mtaalamu wa mawasiliano wa mpango wa urasimishaji rasilimali
(Ardhi) vijijini (Mkurabita) Gloria Mbilimonywa alisema kuwepo kwa mpango huo
hapa nchini kumesaidia kupunguza migogoro ya ardhi iliyokuwepo hapo awali na
kwamba kwa sasa wananchi wengi wamehamasika kushiriki kwenye mpango huo wenye
tija kwao.
Alisema
serikali iendelee na jitihada za kuelimisha taasisi za fedha hapa nchini
kuzipokea hati miliki za kimila ili kutimiza dhima ya kurasimisha rasilimali za
wanyonge vijijini ili waweze kuingia kwenye mfumo rasmi wa kumiliki ardhi.
Mwisho.
 |
| Ofisa Ardhi wa Halmashauri ya wilaya ya Mtwara Johnia Rwebangira akiwaonesha hati miliki ya kimila maofisa mawasiliano serikalini (Hawako pichani) walipotembelea Halmashauri hiyo kwa lengo la kuangalia utekelezaji wa mpango wa kurasimisha rasilimali (Ardhi) vijijini (MKURABITA). |
TANGAZO
Facebook Blogger Plugin by WAYEGE CO.LTD
